“المدارنت”..
=======
مين يمدحه يطلع خاسر..
ويشبّرولوا أيام.. يعيش جمال عبد الناصر
يعيش بصوته واحلامه..
في قلوب شعوب عبد الناصر
مش ناصري.. ولا كنت في يوم..
بالذات في زمنه وفي حينه
لكن العفن وفساد القوم.. نسّاني حتى زنازينه..!
إزّاي ينسينا الحاضر طعم الأصالة اللي في صوتوا
يعيش جمال عبد الناصر.. يعيش جمال حتى في موته
ما هوَّ مات.. فعاش جمال عبد الناصر
اسمه جمال وكان جميل فعلاً
ياما شوفنا شجعان خوافه
عظيم وكان انسان
طبعا المجد مِش شغل صحافة
علشان ده عاش عبد الناصر
أعداؤه كِرهُوا ودي نعمة
مين كِرهُوا اعداؤه صادق
في قلبوا كان حاضن أمة وهمه ومبادىء
ساكنين في صوت عبد الناصر
ملامحنا رجعت بعد غياب.. دلوقتي بس اللى فهمنا
لا كان حرامي ولا كداب ولا نهبها مع اللي معاه
انا بحكي عن عبد الناصر
عشنا الحياة معاه كالحلم.. فلا فساد ولا رهن بلاد
يومها انتشينا ثقافة وعلم وفي زمنه معشناش أحاد
كنا جموع في زمن ناصر
كان الامل فى خضرته بكر
مفيش لصوص للقوت والمال
ومصر ابطال ورجال فكر ومثقفين ستات ورجال
جيوش جمال عبد الناصر
كان الهلال في قلب صليب.. ولا شوفنا ديب بيطارد ديب
ولا جرس خاصم مبنى وحّدنا صوت عبد الناصر
دفعنا تمن الحرية.. بدم مش بدينار ودولار
يوم وقفته فى المنشية..
خلا الرصاص يهرب من عار اعداء جمال عبد الناصر
رغم الحصار كنا احرار.. وفي الهزيمة الشعب مجعش
كان اسمها بلد الثوار.. وقرار زعيمها مبيرجعش..
قرار جمال عبد الناصر
خلّا بلاده أعزّ بلاد.. ليها احترام فى الكون مخصوص
لا شوفنا وِسْطوا فساد.. ولا خطط سمسرة وفلوس
كان الجميع عبد الناصر
لولاه ما كنتوا اتعلمتوا.. ولا بقيتوا دراكولا
يلّي انتوا زعماء وانجازكوا.. دخلتوا مصر الكوكاكولا
وبتشتموا في عبد الناصر
عمره ما جاع فى زمانه فقير.. أو ملتقاش دواء للعلّة
دلوقتي لعبة اخطف طير..
والامة فى خدمة شلّة تكره جمال عبد الناصر
يتريقوا على طوابيره.. علشان فراخ الجمعيه
شوفوه غيره دلوقتي.. وخيره حتى الرغيف بقى أمنية
يرحم جمال عبد الناصر
في ناس بتنهب وتسوس.. لا يهمها من عاش او مات
ورضى العدو عننا يخوف.. معناه اكيد اننا هفوات
من يوم ما مات عبد الناصر
الارض رجعت للاقطاع.. وقالوا رجعت لصحابها
وأهو صاحبك الفلاح.. أهو جاع..
بعت العقود اللي كتبها بخط إيد عبد الناصر
أنا أذكرك من غير ذكرى.. والناس بتفتكرك بخشوع
الامس واليوم ده وبكره.. يبكوك بعظمة مش بدموع
دلوقتي رجعوا الفقراء.. خلاص سكنوا جحورهم من تاني
رحل معاك زمن الاخلاص.. وجّاه زمن غير انساني مهوش زمن عبد الناصر
صحينا على زمن الغاز.. يحكمنا فيه أهل الاعمال
اتوحّشوا فى جمع الاموال.. ورجعنا سادة وخوادم ضد اتجاه عبد الناصر
يا جمال نجيب زيّك من فين.. يا نار يا ثورة يا ندهة ناي
البوسطجي اللي اسمه حسين.. أبوك.. منين جابك؟!
لو هكتبك ما تساع اقلام.. ولا كلام غالي..
وأوراق الأمر.. وما فيه انا مشتاق..
فقولت.. أمسّي عليك..
وأنام نومة جمال عبد الناصر.
==========================
تعليق واحد